مدونة أنا مصري

السبت، 27 فبراير، 2010

من فضلك انزل من مكان النزول واطلع من مكان الطلوع !!

بما ان المترو اصبح هو بيتي التاني وهو وسيلة المواصلات الوحيدة اللي بركبها عشان اروح حلوااااااااان (اصلها بعيدة) خلاص حفظت كل اليفط والاعلانات البصرية والصوتية والمرئية ... وكمان فهمت وجهة نظر الادارة العامة لتشغيل المترو في حوار ان المترو يجرش في المحطات اللي فيها 3 حارات وأكثرها محطة طرة البلد اللي كان دايما دايما المترو بيقف فيها يوم الامتحان الصبح ...

المهم في دا كله .. أنا عاجبني اوي نظام ابواب الصعود وابواب النزول اللي هما عملوها والحملة الكبيرة اللي بتتذاع في المترو من اعلانات صوتية واعلانات مطبوعة وكمان الالوان علي رصيف المترو .. كل دا حلو أوي .. انا دايمكا متعود اركب من محطة حسني مبارك في تاني عربية تاني باب ودا بيكون اخف في الزحمة .. ودا طبعا باب صعود ولما باجي انزل من المترو بانزل من الباب الاول لأنه الاقرب لباب خروج محطة المترو ... اذا انا باطبق القانون اللي عملته ادارة المترو بحذافيره ...

أجي بقي لموضع هام اوي .. هو تعيين شباب واقفين علي ابواب المترو عشان يرشدوا الناس ان دا نزول فقط ودا صعود فقط .. أد ايه فرحت جدا في يوم لما لاقيت الناس بتستجيب وتطلع من باب وتلف تقف في الباب اللي بعده عشان النزول وبيبقي ساعتها نفسي اخد الشخص ده بالحضن والبوس لانه عمل حاجة صح ..

النهاردة بقي .. وانا في المترو، كنت باراقب تصرفات الناس وهل حيستجيبوا للشباب اللي طلع لامؤخذا عينها في الزحمة والحر عشان توجه الناس للباب الصح .. وفجأة وكان متوقع جدا ان في اتنين "عواجيز" عايزين يركبوا من باب النزول وكانوا هما الاتنين بس اللي واقفين قدام الباب .. والشاب دة كان فاضل ينزل يبوس بطن جزمتهم عشان يقفوا في المكان المخصص للطلوع .. ولكن هيهات .. راحوا زعقوا للراجل وسبوا دينه ودين اللي يتشدد له وكانوا عايزين يضربوه كمان .. مع ان هو الصح جدا واللي معاه الحق جدا ...

استوقفني سيناريو ...  لنفترض ان الحكومة ادت الحق للهيهة العامة لتشغيل المترو انها تفرض غرامة 100 سحتوت علي كل واحد ما ينفذش القرار ده وبخل بالنظام .. يعني الاتين رجاله دول يتعمل لهم غرامة وقتي ولو رفضوا يتعملهم محضر كمان .. ماهو بما ان في شاب واقف قدام كل باب مترو ... ايه المانع انهم يصطادوا كل يوم 100 شخص يعملوله غرامة عشان الباقي يتعظ ويمشي علي النظام ...
الفكرة من النظام العقيم دا بقي (غرامة عدم الالتزام بالباب المخصص) .. اننا حنبقي شعب عملين زي لامؤخذة الــــــــــــ...... اللي يمشي بالكرباج .. بتشد يمشي، نرخي نبقي همج ... مش عارف ليه حاسس اني مش حاعيش للوقت اللي ينصلح فيها البلد .... واهو كل ما نعيش ياما نشوف (مهازل طبعا) ... أبدأ بنفسك، تريح نفسك ولاحقا غيرك

Ana Masry - أنا مصري

- ana masry - I'm Egyption - Je suis egyption - Ich bin egyption - .... بكل لغات العالم انا المصري اللي يحب ويهيم علي وجهه، اللي يضحك وقت المشاكل، اللي بقول صباح الفل للسواق اللي جنبه في الاشارة، اللي بينسي اذا كان اهلاوي ولا زملكاوي وقت ماتش المنتخب، اللي ينسي اذا كان مسيحي ولا مسلم لو شاف صاحبه بيتخانق، اللي لما يشوف بنت حلوة بقول أموت انا في الورد الابيض، انا المصري اللي قلبه طيب وبيصدق كل حاجة تتقاله حتي لو كانت ضد المنطق او خارج حدود قانون الجاذبية .. انا المصري ، ايوه انا مصري